அரசு மருத்துவமனைகளில் பிறக்கும் குழந்தைகளுக்கு தங்க மோதிரம் வழங்கும் திட்டம்: டெண்டர் கோரியது அரசு, செப்டம்பர் 15ல் முதல்வர் விஜய் தொடங்கி வைக்கிறார்

தாய்மாமன் தங்க மோதிரத் திட்டம்

அரசு மருத்துவமனைகளில் பிறக்கும் குழந்தைகளுக்கு ‘தாய்மாமன் தங்க மோதிரம்’ வழங்கும் திட்டத்தை செயல்படுத்துவதற்கான பூர்வாங்க பணிகளை அரசு தொடங்கியுள்ளது. இதன் ஒரு பகுதியாக, தங்கம் வாங்குவதற்கான டெண்டர்களை அரசு தற்போது வரவேற்றுள்ளது.

தேர்தல் பிரச்சாரத்தின் போது, அரசு மருத்துவமனைகளில் பிறக்கும் குழந்தைகளுக்கு தங்க மோதிரம் மற்றும் இதர பொருட்கள் அடங்கிய ‘தாய்மாமன் சீர்வரிசைப் பெட்டி’ வழங்கப்படும் என்று டிவிகே வாக்குறுதி அளித்திருந்தது. தற்போது ஆட்சிப் பொறுப்பேற்றுள்ள நிலையில், இந்த வாக்குறுதியை நிறைவேற்றும் வகையில் இத்திட்டம் செயல்படுத்தப்பட உள்ளதாக அறிவிக்கப்பட்டுள்ளது.

தகுதி மற்றும் நிபந்தனைகள்

இத்திட்டத்தின் கீழ் பயன்பெறுவதற்கு சில முக்கிய தகுதிகள் மற்றும் நிபந்தனைகள் நிர்ணயிக்கப்பட்டுள்ளன. அதன்படி, இத்திட்டத்தின் மூலம் பலன் பெற விரும்புவோர் மாநிலத்தின் நிரந்தர குடியிருப்பாளர்களாக இருக்க வேண்டும்.

மேலும், அரசு மருத்துவமனைகள் மற்றும் அரசு ஆரம்ப சுகாதார நிலையங்களில் பிறக்கும் குழந்தைகளுக்கு மட்டுமே இந்தத் திட்டம் பொருந்தும் என்று அறிவிக்கப்பட்டுள்ளது. இத்திட்டத்தை வெற்றிகரமாக செயல்படுத்துவதற்காக ஆண்டுக்கு சுமார் ரூ. 755.83 கோடி செலவாகும் என்று மதிப்பிடப்பட்டுள்ளது.

செப்டம்பர் 15 முதல் தொடக்கம்

இத்திட்டத்திற்குத் தேவையான தங்கம் வாங்குவதற்காக அரசு தற்போது டெண்டர்களை கோரியுள்ளது. பேரறிஞர் அண்ணாவின் பிறந்தநாளான செப்டம்பர் 15 ஆம் தேதி அன்று முதலமைச்சர் விஜய் இத்திட்டத்தை அதிகாரப்பூர்வமாக தொடங்கி வைக்க உள்ளார்.

அரசு மருத்துவமனைகளில் பிரசவிக்கும் ஏழை, எளிய குடும்பங்களுக்கு உதவும் வகையில் இந்தத் திட்டம் வடிவமைக்கப்பட்டு செயல்படுத்தப்பட உள்ளது.