“பங்காளி சண்டை முடிந்துவிட்டது!” – எடப்பாடி பழனிசாமியுடன் கைகோர்த்த டிடிவி தினகரன்: மதுராந்தகம் மேடையில் அதிரடி!

தமிழகத்தில் 2026 சட்டமன்றத் தேர்தல் களம் இப்போதே சூடுபிடிக்கத் தொடங்கியுள்ளது. ஆளும் திமுகவை வீழ்த்த அதிமுக, பாஜக, பாமக மற்றும் அமமுக ஆகிய கட்சிகள் ஒன்றிணைந்து தேசிய ஜனநாயகக் கூட்டணியை (NDA) பலப்படுத்தியுள்ளன. இந்த நிலையில், செங்கல்பட்டு மாவட்டம் மதுராந்தகத்தில் இன்று நடைபெற்ற பிரம்மாண்ட தேர்தல் பரப்புரை பொதுக்கூட்டம் அரசியல் வட்டாரத்தில் பெரும் கவனத்தை ஈர்த்துள்ளது.

இந்தக் கூட்டத்தில் பிரதமர் நரேந்திர மோடி கலந்துகொண்டார். அவரை அதிமுக பொதுச்செயலாளர் எடப்பாடி பழனிசாமி பச்சைத் துண்டு மற்றும் ஏலக்காய் மாலை அணிவித்து உற்சாகமாக வரவேற்றார். நீண்ட காலத்திற்குப் பிறகு எடப்பாடி பழனிசாமியும், டிடிவி தினகரனும் ஒரே மேடையில் தோன்றி, தங்களுக்குள் இருந்த கசப்புணர்வுகளைத் தூக்கி எறிந்துவிட்டு கைகோர்த்தது தொண்டர்களிடையே நெகிழ்ச்சியை ஏற்படுத்தியது.

மேடையில் உரையாற்றிய அமமுக பொதுச்செயலாளர் டிடிவி தினகரன், எடப்பாடி பழனிசாமியைப் பெயர் குறிப்பிட்டு வரவேற்றுப் பேசினார். அவர் பேசுகையில், “எங்களுக்குள் முன்னதாக கருத்து வேறுபாடுகள் மற்றும் சண்டைகள் இருந்தது உண்மைதான். ஆனால் இப்போது அந்தப் பங்காளி சண்டை முடிந்துவிட்டது. நாங்கள் அனைவரும் மறைந்த முதல்வர் அம்மாவின் உண்மையான தொண்டர்கள் என்பதை எங்கள் எதிரிகள் மறந்துவிட்டார்கள்,” என்று குறிப்பிட்டார்.

மேலும், “தமிழ்நாட்டின் நலன் கருதியும், அமமுகவின் நலன் கருதியும், பிரதமர் மோடியின் அழைப்பை ஏற்று எந்தவித அழுத்தமும் இன்றி மனப்பூர்வமாக இந்தக் கூட்டணியில் இணைந்துள்ளோம். எடப்பாடி பழனிசாமி தலைமையிலான இந்த வெற்றிக் கூட்டணியை வெற்றி பெறச் செய்ய அமமுகவின் ஒவ்வொரு தொண்டனும் தமிழகம் முழுவதும் அயராது உழைப்பான்” என டிடிவி தினகரன் சூளுரைத்தார். இந்த மேடையில் பாமக தலைவர் அன்புமணி ராமதாஸ் உள்ளிட்ட கூட்டணி கட்சித் தலைவர்களும் பங்கேற்று உரையாற்றினர். பல ஆண்டுகளாக நீடித்த அரசியல் பகையை மறந்து ‘பங்காளிகள்’ ஒன்றிணைந்திருப்பது 2026 தேர்தல் களத்தில் புதிய திருப்பத்தை ஏற்படுத்தியுள்ளது.