மார்ச் 2வது வாரத்தில் தஞ்சாவூரில் TVK நிர்வாகிகள் சந்திப்பு – விஜய்யின் அடுத்த நகர்வு

சென்னை: தமிழக வெற்றி கழக (TVK) தலைவர் விஜய், மார்ச் மாதம் இரண்டாவது வாரத்தில் தஞ்சாவூரில் நிர்வாகிகள் சந்திப்பு கூட்டத்தில் பங்கேற்க உள்ளார். இதற்கான அனுமதி மனுவை காவல்துறைக்கு TVK தரப்பில் விரைவில் சமர்ப்பிக்க உள்ளதாக தகவல்கள் தெரிவிக்கின்றன.

இதனுடன், பொள்ளாச்சியிலும் நிர்வாகிகள் சந்திப்பு கூட்டம் நடத்த விஜய் தயாராகி வருகிறார். ஒவ்வொரு 10 நாட்களுக்கும் ஒரு நிர்வாகிகள் சந்திப்பு கூட்டம் நடத்தும் திட்டத்தை அவர் முன்னெடுத்து வருகிறார். பிப்ரவரி மாதத்தில் மட்டும் TVK 3வது ஆண்டு விழா, சேலம் மற்றும் வேலூர் நிர்வாகிகள் சந்திப்பு கூட்டங்களில் விஜய் பங்கேற்றிருந்தார்.

அடுத்த கட்டமாக தஞ்சாவூர் மற்றும் பொள்ளாச்சியில் நடைபெறவுள்ள கூட்டங்கள், TVK-வின் தேர்தல் முன்னேற்பாடுகளில் முக்கியமானதாகக் கருதப்படுகின்றன. இதற்கிடையில், TVK-வின் முதற்கட்ட வேட்பாளர் பட்டியலையும் விஜய் தயாரித்து வருகிறார். விரைவில் அந்த பட்டியலை வெளியிடும் திட்டமும் உள்ளது.

நகர்ப்புறங்களில் விஜய்க்கு அதிக ஆதரவு இருப்பதாகக் கூறப்படும் நிலையில், இந்த நிர்வாகிகள் சந்திப்பு கூட்டங்கள் கட்சியின் தரை மட்ட வலிமையை மேலும் உறுதிப்படுத்தும் நிகழ்வாகக் கருதப்படுகின்றன.