2026 தேர்தல் களம்: திமுக – அதிமுக இடையே கடும் போட்டி! விஜய்யின் வருகை யாருடைய ஓட்டுகளைப் பிரிக்கும்?
தமிழக அரசியலில் 2026 சட்டமன்றத் தேர்தல் இப்போதே சூடுபிடிக்கத் தொடங்கியுள்ளது. ஆளுங்கட்சியான திமுக ஒருபுறம் தனது செல்வாக்கைத் தக்கவைக்கப் போராடும் நிலையில், எதிர்க்கட்சியான அதிமுக மீண்டும் ஆட்சியைப் பிடிக்கப் பல்வேறு வியூகங்களை வகுத்து வருகிறது. சமீபத்திய புள்ளிவிவரங்களின்படி, வரும் தேர்தலில் இரு முக்கிய திராவிடக் கட்சிகளுக்கும் இடையே மிகக் குறுகிய வாக்கு வித்தியாசமே நிலவும் என எதிர்பார்க்கப்படுகிறது.
கடந்த 2024 நாடாளுமன்றத் தேர்தல் முடிவுகளை அடிப்படையாகக் கொண்டு பார்த்தால், திமுக கூட்டணி 46.9% வாக்குகளையும், அதிமுக – பாஜக கூட்டணி 38.74% வாக்குகளையும் பெற்றுள்ளன. இரண்டுக்கும் இடையிலான வித்தியாசம் வெறும் 8.16% மட்டுமே. பொதுவாக, தமிழக சட்டமன்றத் தேர்தல்களில் ஆளுங்கட்சிக்கு எதிராகச் சுமார் 5% வாக்குகள் மாறுவது இயல்பான ஒன்று. அவ்வாறு நிகழும்பட்சத்தில், திமுக மற்றும் அதிமுக அணிகளுக்கிடையிலான போட்டி 3% என்ற மிகக் குறைந்த வாக்கு வித்தியாசத்திற்கு வந்துவிடும். இது தேர்தலை மிகவும் சவாலானதாக மாற்றும்.
இந்தச் சூழலில், நடிகர் விஜய்யின் ‘தமிழக வெற்றிக் கழகம்’ (தவெக) தேர்தலில் எந்த மாதிரியான தாக்கத்தை ஏற்படுத்தும் என்பதே அரசியல் விமர்சகர்களின் பெரிய கேள்வியாக உள்ளது. விஜய்யின் வருகை திமுக மற்றும் அதிமுக ஆகிய இரு முகாம்களுக்கும் சவால்களைக் கொண்டுவரும் எனக் கணிக்கப்படுகிறது.
விஜய்க்கு இளைஞர்கள் மற்றும் பெண்கள் மத்தியில் இருக்கும் ஆதரவு, கடந்த தேர்தலில் திமுகவிற்குச் சென்ற அந்த வாக்கு வங்கியில் சரிவை ஏற்படுத்த வாய்ப்புள்ளது. குறிப்பாக, பாஜகவை எதிர்க்க நினைக்கும் நடுநிலை வாக்காளர்களின் ஒரு பகுதி விஜய்யை நோக்கி நகரலாம். மறுபுறம், திமுக ஆட்சிக்கு எதிரான அதிருப்தி வாக்குகளைப் பெறக் காத்திருக்கும் அதிமுகவிற்கு, அதே அதிருப்தி வாக்குகளை விஜய் பிரிப்பது பெரிய பின்னடைவாக அமையும்.
சுருக்கமாகச் சொன்னால், ஒன்றரை சதவீத வாக்குகள் கூட ஆட்சிய தீர்மானிக்கும் நிலையில், விஜய்யின் வருகை ஒரு ‘கேம் சேஞ்சராக’ அமையுமா அல்லது வாக்குகளைப் பிரிக்கும் காரணியாக இருக்குமா என்பது 2026 தேர்தலில்தான் தெரியவரும்.
Published in: Tamil
