தமிழகத்தில் குடியரசுத் தலைவர் ஆட்சி? – ஜோஹோ ஸ்ரீதர் வேம்புவின் அதிரடி கோரிக்கை! “விஜய் மீண்டும் மாபெரும் வெற்றியுடன் வருவார்!”

சென்னை: தமிழக சட்டமன்றத் தேர்தல் முடிவுகள் வெளியாகி, ஆட்சி அமைப்பதில் இழுபறி நீடித்து வரும் சூழலில், ஜோஹோ (Zoho) நிறுவனத்தின் நிறுவனர் ஸ்ரீதர் வேம்புவின் எக்ஸ் (X) தளப் பதிவு அரசியல் வட்டாரத்தில் பெரும் பரபரப்பை ஏற்படுத்தியுள்ளது. தமிழகத்தில் நிலவும் தற்போதைய அரசியல் சூழலுக்கு “மறுதேர்தல்” மட்டுமே தீர்வு என்று அவர் அதிரடியாகத் தெரிவித்துள்ளார்.

ஆட்சி அமைப்பதில் சிக்கல் – ஸ்ரீதர் வேம்புவின் பார்வை

தமிழகத்தில் எந்தவொரு கட்சிக்கும் தெளிவான பெரும்பான்மை கிடைக்காத நிலையில், ஆட்சி அமைப்பதில் முட்டுக்கட்டை ஏற்பட்டுள்ளது. இது குறித்து ஸ்ரீதர் வேம்பு தனது பதிவில் குறிப்பிட்டதாவது:

“தற்போது எந்தக் கட்சிக்கும் போதுமான பலம் இருப்பதாகத் தெரியவில்லை. ஒருவேளை அரசு அமைந்தாலும், பல்வேறு அழுத்தங்கள் மற்றும் உட்பூசல்கள் காரணமாக அது நிலையற்றதாகவே இருக்கும். தமிழக மக்கள் ஒரு சிறந்த ஆட்சிக்குத் தகுதியானவர்கள்.”

தீர்வு என்ன? – முக்கிய பரிந்துரைகள்

தற்போதைய அரசியல் தேக்க நிலையை உடைக்க ஸ்ரீதர் வேம்பு முன்வைக்கும் முக்கிய அம்சங்கள்:

• குடியரசுத் தலைவர் ஆட்சி: தமிழகத்தில் உடனடியாகக் குடியரசுத் தலைவர் ஆட்சியை அமல்படுத்த வேண்டும்.
• மறுதேர்தல்: மீண்டும் ஒரு சட்டமன்றத் தேர்தலை நடத்த வேண்டும். ஆனால், இம்முறை ‘வாக்கிற்குப் பணம்’ கொடுக்கும் முறையைத் தடுத்து நிறுத்தி, மிகக் கடுமையான முறையில் தேர்தலை நடத்த வேண்டும். அப்போதுதான் மக்களின் உண்மையான தீர்ப்பு வெளிப்படும்.
• விஜய்யின் வெற்றி: மீண்டும் தேர்தல் நடந்தால், நடிகர் விஜய்யின் தமிழக வெற்றிக் கழகம் (TVK) மாபெரும் பெரும்பான்மையுடன் வெற்றி பெற்றுத் திரும்பும் என்று நான் கருதுகிறேன்.
• எதிர்க்கட்சிகளுக்கு சவால்: திமுக மற்றும் அதிமுக ஒருவேளை விஜய்யின் வெற்றியைத் தடுக்க நினைத்தால், அவை இரண்டும் இணைந்து போட்டியிடலாம்.
• பாஜகவின் நிலை: பாஜக தனித்தே போட்டியிட வேண்டும். ஒரு சீட் கூட கிடைக்காவிட்டாலும் பரவாயில்லை, அது அந்தப் கட்சிக்கு ஒரு புதிய தொடக்கமாக அமையும்.

பின்னணி:

சமீபத்தில் நடைபெற்ற 234 தொகுதிகளுக்கான சட்டமன்றத் தேர்தலில், விஜய்யின் தமிழக வெற்றிக் கழகம் 108 இடங்களைக் கைப்பற்றியது. ஆட்சி அமைக்கத் தேவையான 118 என்ற இலக்கை எட்ட முடியாததால் இழுபறி நீடிக்கிறது. காங்கிரஸ் கட்சி (5 இடங்கள்) விஜய்க்கு ஆதரவு அளித்த போதிலும், மெஜாரிட்டியை நிரூபிப்பதில் ஆளுநர் அதிருப்தி தெரிவித்துள்ள நிலையில், ஸ்ரீதர் வேம்புவின் இந்த கருத்துக்கள் அரசியல் களத்தில் முக்கியத்துவம் பெற்றுள்ளன.