மாம்பழம் சின்னம் யாருக்கு? ராமதாஸின் கடும் கண்டனமும் – அன்புமணி கொடுத்த அதிரடி விளக்கமும்!
மதுராந்தகத்தில் பிரதமர் மோடி பங்கேற்கும் பொதுக்கூட்ட மேடையில் பாமகவின் ‘மாம்பழம்’ சின்னம் இடம்பெற்றது சர்ச்சையை ஏற்படுத்தியுள்ளது.”, ‘மாம்பழம் சின்னத்தை பயன்படுத்தியது சட்டவிரோதம் என்றும், பிரதமருக்கு இழைக்கப்பட்ட அவமரியாதை என்றும் ராமதாஸ் கண்டனம் தெரிவித்துள்ளார்.’, ‘தேர்தல் ஆணையம் தங்கள் தரப்பையே அங்கீகரித்துள்ளதாக அன்புமணி ராமதாஸ் விளக்கம் அளித்துள்ளார்.’, ‘சட்டமன்றத் தேர்தலில் அதிமுக-பாஜக கூட்டணியில் அன்புமணி தலைமையிலான பாமக அங்கம் வகிக்கிறது.’, ‘அடுத்த இரண்டு மாதங்களில் தமிழகத்தில் ஆட்சி மாற்றம் ஏற்படும் என அன்புமணி ராமதாஸ் ஆவேசமாக தெரிவித்துள்ளார்.
தமிழக சட்டமன்றத் தேர்தல் நெருங்கி வரும் வேளையில், பாட்டாளி மக்கள் கட்சியின் உட்கட்சிப் பூசல் தற்போது உச்சகட்டத்தை எட்டியுள்ளது. செங்கல்பட்டு மாவட்டம் மதுராந்தகத்தில் பிரதமர் நரேந்திர மோடி பங்கேற்கும் என்.டி.ஏ கூட்டணியின் பிரம்மாண்ட பொதுக்கூட்டம் இன்று நடைபெறுகிறது. இந்தப் பொதுக்கூட்ட மேடையில் அதிமுக, பாஜக உள்ளிட்ட கூட்டணி கட்சிகளின் சின்னங்களுடன் பாமகவின் ‘மாம்பழம்’ சின்னமும் இடம்பெற்றுள்ளது.
தற்போது பாமகவில் ராமதாஸ் மற்றும் அன்புமணி ராமதாஸ் என இரு தரப்பினர் பிரிந்து செயல்பட்டு வரும் நிலையில், அன்புமணி தரப்பு அதிமுக-பாஜக கூட்டணியில் இணைந்துள்ளது. இந்நிலையில், பொதுக்கூட்ட மேடையில் மாம்பழம் சின்னம் பயன்படுத்தப்பட்டிருப்பதற்கு பாமக நிறுவனர் ராமதாஸ் கடும் எதிர்ப்பு தெரிவித்துள்ளார்.
இது குறித்து ராமதாஸ் கூறுகையில், “தேர்தல் ஆணையத்தால் முறையாக அங்கீகரிக்கப்படாத நிலையில், மாம்பழம் சின்னத்தை பொதுக்கூட்ட மேடையில் பயன்படுத்துவது சட்டவிரோதமானது. இது அதிகார துஷ்பிரயோகம் மட்டுமல்லாது, பிரதமர் பதவிக்கு இழைக்கப்படும் அவமரியாதை” எனச் சாடியுள்ளார்.
இதற்கு பதிலளித்த அன்புமணி ராமதாஸ், “தேர்தல் ஆணையம் எங்களையே அதிகாரப்பூர்வமாக அங்கீகரித்துள்ளது. இது குறித்து ஏதேனும் சந்தேகங்கள் இருந்தால் அவர்கள் தேர்தல் ஆணையத்திடம் தான் கேட்க வேண்டும்” என்று திட்டவட்டமாகத் தெரிவித்தார். தமிழக மக்கள் திமுக ஆட்சிக்கு எதிராக முடிவெடுத்துவிட்டதாகவும், எதிர்க்கட்சிகள் ஒன்றிணைந்துள்ளதால் இன்னும் இரண்டு மாதங்களில் தமிழகத்தில் ஆட்சி மாற்றம் ஏற்படும் என்றும் அவர் நம்பிக்கை தெரிவித்தார்.