ஸ்னாப்-சாட்டிற்குப் போட்டியாக இன்ஸ்டாகிராமின் புதிய ஆப்.. அந்த நாடுகளில் சோதனை முயற்சி!

சமூக ஊடகங்களில் செயற்கையான அழகை விட, உண்மையான தருணங்களுக்கு (Authenticity) முக்கியத்துவம் அளிக்க வேண்டும் என்ற நோக்கத்தில், இன்ஸ்டாகிராமின் தாய் நிறுவனமான மெட்டா (Meta), ‘இன்ஸ்டன்ட்ஸ்’ (Instants) என்ற புதிய செயலியை உருவாக்கி வருகிறது. ஏற்கனவே பீ-ரியல் (BeReal), ஸ்னாப்-சாட் போன்ற செயலிகள் வழங்கி வரும் ‘அன்ஃபில்டர்டு’ (Unfiltered) அனுபவத்தை தங்கள் பயனர்களுக்கும் வழங்க மெட்டா திட்டமிட்டுள்ளது.

என்ன இந்த இன்ஸ்டன்ட்ஸ்? இதன் சிறப்பம்சங்கள் என்ன?

‘இன்ஸ்டன்ட்ஸ்’ என்பது முழுமையான ‘ரா’ (Raw) புகைப்படங்கள் மற்றும் வீடியோக்களைப் பகிர்ந்து கொள்ளும் ஒரு தளமாகும். இந்த செயலியின் முக்கிய அம்சங்கள் இதோ:

• எடிட்டிங் கிடையாது: இந்த ஆப்பில் புகைப்படங்கள் அல்லது வீடியோக்களை எடிட் செய்யும் வசதி இருக்காது.
• ஃபில்டர்கள் இல்லை: எந்தவிதமான ஃபில்டர்களையோ அல்லது ஏஐ (AI) தொழில்நுட்பத்தையோ பயன்படுத்தி மாற்றங்கள் செய்ய முடியாது.
• நேரடிப் பகிர்வு: உங்கள் ஃபோன் கேலரியில் உள்ள பழைய புகைப்படங்களை இதில் பதிவேற்ற முடியாது. ஆப்பில் உள்ள கேமராவைப் பயன்படுத்தி அந்தந்த நேரத்தில் எடுக்கும் படங்களை மட்டுமே பகிர முடியும்.
• தன்னியக்க நீக்கம்: நீங்கள் பகிரும் பதிவுகள் 24 மணிநேரத்திற்குப் பிறகு தானாகவே மறைந்துவிடும்.
• இன்ஸ்டாகிராம் இணைப்பு: உங்கள் இன்ஸ்டன்ட்ஸ் பதிவுகளை அந்த ஆப்பில் மட்டும் தெரியும்படி வைக்கலாம் அல்லது இன்ஸ்டாகிராம் ஸ்டோரிகளிலும் பகிர்ந்து கொள்ளலாம்.

எங்கே கிடைக்கிறது?

மெட்டா நிறுவனம் இந்த செயலியை தற்போது சோதனை முறையில் வைத்துள்ளது. முதற்கட்டமாக ஸ்பெயின் மற்றும் இத்தாலி போன்ற நாடுகளில் உள்ள தேர்ந்தெடுக்கப்பட்ட பயனர்களுக்கு மட்டுமே இது கிடைக்கிறது. அங்கிருந்து கிடைக்கும் கருத்துகளின் (Feedback) அடிப்படையில், இந்த ஆப் உலகளவில் எப்போது வெளியாகும் என்பது முடிவு செய்யப்படும்.

மெட்டா நிறுவனம் இன்ஸ்டாகிராமிற்கு துணையாகப் பல சிறிய செயலிகளை (Sub-apps) அறிமுகப்படுத்தி வருகிறது. ஏற்கனவே எக்ஸ் (ட்விட்டர்) தளத்திற்குப் போட்டியாக ‘த்ரெட்ஸ்’ (Threads) மற்றும் வீடியோ எடிட்டிங்கிற்காக ‘எடிட்ஸ்’ (Edits) போன்றவற்றைத் தந்துள்ள மெட்டா, இப்போது ‘இன்ஸ்டன்ட்ஸ்’ மூலம் இளைஞர்களைக் கவரத் தயாராகிவிட்டது.