மதுரை வடக்குத் தொகுதி எங்களுக்கே: திமுக கூட்டணிக்குள் சலசலப்பை ஏற்படுத்திய மாணிக்கம் தாகூர் பேச்சு!

தமிழக அரசியலில் 2026 சட்டமன்றத் தேர்தல் களம் இப்போதே சூடுபிடிக்கத் தொடங்கியுள்ளது. குறிப்பாக, திமுக – காங்கிரஸ் இடையிலான தொகுதிப் பங்கீடு மற்றும் கூட்டணி விவகாரங்கள் பெரும் விவாதப் பொருளாக மாறியுள்ள நிலையில், விருதுநகர் நாடாளுமன்ற உறுப்பினர் மாணிக்கம் தாகூர் அதிரடியான கருத்தைப் பகிர்ந்துள்ளார்.

மதுரையில் செய்தியாளர்களிடம் பேசிய அவர், ‘மதுரை வடக்குத் தொகுதியை காங்கிரஸ் கட்சி நிச்சயம் கேட்கும்; அதில் எந்தவிதமான சந்தேகமும் இல்லை’ என்று திட்டவட்டமாகத் தெரிவித்தார். இது தொடர்பாக அகில இந்திய காங்கிரஸ் கமிட்டி தலைவரைச் சந்தித்துப் பேசியிருப்பதாகவும், கட்சியின் தன்மானம் தங்களுக்கு மிக முக்கியமானது என்றும் அவர் கூறினார்.

சமீபகாலமாக திமுக மற்றும் காங்கிரஸ் நிர்வாகிகளிடையே வார்த்தைப் போர் முற்றிய நிலையில், கூட்டணி நீடிக்குமா என்ற கேள்வி எழுந்தது. இந்தச் சூழலில், திமுக துணைப் பொதுச்செயலாளர் கனிமொழி, காங்கிரஸ் தலைவர் ராகுல் காந்தியைச் சந்தித்துப் பேசினார். இந்தச் சந்திப்பைத் தொடர்ந்து கூட்டணி உறுதியானதாகக் கருதப்பட்டாலும், தொகுதிப் பங்கீட்டில் காங்கிரஸ் பிடிவாதமாக இருப்பதை மாணிக்கம் தாகூரின் பேச்சு உணர்த்துகிறது.

இதற்கிடையே, மாணிக்கம் தாகூரின் இந்தக் கருத்திற்குப் பதிலளித்த பொள்ளாச்சி எம்பி ஈஸ்வரசாமி, ‘திமுக கூட்டணிக்கு முதலமைச்சர் ஸ்டாலின்தான் தலைமை தாங்குகிறார். இந்த கூட்டணியில் எந்தப் பிளவும் இல்லை. ஊடகங்கள்தான் இந்த விவகாரத்தைப் பெரிதுபடுத்துகின்றன’ என்று விளக்கம் அளித்துள்ளார். தொகுதிப் பங்கீடு அதிகாரப்பூர்வமாகத் தொடங்குவதற்கு முன்பே மதுரை வடக்குத் தொகுதியைக் காங்கிரஸ் கோரியிருப்பது அரசியல் வட்டாரத்தில் பரபரப்பை ஏற்படுத்தியுள்ளது.

Topics: #மாணிக்கம்தாகூர் #மதுரைவடக்கு #காங்கிரஸ் #திமுககூட்டணி #2026சட்டமன்றத்தேர்தல் #கனிமொழி #ராகுல்காந்தி #தமிழ்நாடுஅரசியல்