இஸ்லாமாபாத்: மேற்கு ஆசியாவில் நிலவி வரும் மோதல்களை முடிவுக்குக் கொண்டு வருவதை நோக்கமாகக் கொண்டு, ஒரு முக்கிய முன்னேற்றம் ஏற்பட்டுள்ளது. ஒரு புதிய ஒப்பந்தம் தொடர்பாக அமெரிக்கா மற்றும் ஈரான் (USA – Iran) நாடுகள் மீண்டும் பேச்சுவார்த்தை நடத்தத் தயாராகி வருகின்றன. இதற்காக இரு நாடுகளின் பிரதிநிதிகளும் அடுத்த வாரம் பாகிஸ்தான் தலைநகர் இஸ்லாமாபாத்திற்கு வரவுள்ளதாக ஊடகச் செய்திகள் தெரிவிக்கின்றன.
14 அம்ச ஒப்பந்தம்: இந்த மோதல்களுக்கு முற்றுப்புள்ளி வைக்கும் வகையில், 14 அம்சங்கள் கொண்ட புரிந்துணர்வு ஒப்பந்தத்தில் இரு நாடுகளும் கையெழுத்திட வாய்ப்புள்ளதாக அந்தச் செய்திகள் கூறுகின்றன. இதில் ஈரானின் அணுசக்தித் திட்டம், அந்நாட்டிடம் உள்ள யுரேனிய இருப்புக்களை இடமாற்றம் செய்தல் மற்றும் ஹார்முஸ் ஜலசந்தியில் (Strait of Hormuz) நிலவும் பதற்றத்தைக் குறைத்தல் போன்ற முக்கிய விஷயங்கள் இடம்பெற்றுள்ளன. அதேநேரம், தங்கள் நாட்டின் மீது விதிக்கப்பட்டுள்ள பொருளாதாரத் தடைகளை நீக்க வேண்டும் என்று ஈரான் ஆரம்பத்திலிருந்தே வலியுறுத்தி வருகிறது. இந்தப் பேச்சுவார்த்தைக்கு அதுவே முக்கியத் தடையாக இருந்து வருகிறது. பேச்சுவார்த்தை சுமுகமாக முடிந்தால், இரு நாடுகளுக்கும் இடையே நிலவும் போர்நிறுத்த ஒப்பந்தம் மேலும் சில காலத்திற்கு நீட்டிக்கப்பட வாய்ப்புள்ளது.
டொனால்ட் ட்ரம்ப் நம்பிக்கை: இதற்கிடையில், மேற்கு ஆசிய மோதலை முடிவுக்குக் கொண்டு வருவதற்காகத் தாங்கள் அனுப்பிய முன்மொழிவுகளுக்கு ஈரானிடமிருந்து இன்று பதில் கிடைக்கும் என்று அமெரிக்க அதிபர் டொனால்ட் ட்ரம்ப் (Donald Trump) நம்பிக்கை தெரிவித்துள்ளார். ஈரான் வேண்டுமென்றே இந்த விஷயத்தை இழுத்தடிக்கிறதா என்று செய்தியாளர்கள் கேட்டதற்கு, “விரைவிலேயே நமக்கு இது பற்றித் தெரியவரும்” என்று அவர் பதிலளித்தார்.
மேலும், ஹார்முஸ் ஜலசந்தியில் சிக்கியுள்ள கப்பல்களைப் பாதுகாப்பாக வெளியே கொண்டு வருவதற்காகத் தொடங்கப்பட்ட ‘புராஜெக்ட் ஃப்ரீடம்’ (Project Freedom) திட்டத்தை மீண்டும் செயல்படுத்துவது குறித்துத் தமது நிர்வாகம் பரிசீலித்து வருவதாக ட்ரம்ப் கூறினார். ஒருவேளை ஈரான் இந்த ஒப்பந்தத்தில் விரைவில் கையெழுத்திடாவிட்டால், இந்தத் திட்டத்தை ‘புராஜெக்ட் ஃப்ரீடம் பிளஸ்’ (Project Freedom Plus) என்ற பெயரில் விரிவுபடுத்திச் செயல்படுத்துவோம் என்றும், கப்பல்களை மீட்பதுடன் கூடுதல் நடவடிக்கைகளையும் மேற்கொள்வோம் என்றும் அவர் எச்சரித்துள்ளார்.